ഞാനൊരു കടൽ

കടൽമണമുള്ളൊരാളുമായി കുറച്ചു കടൽവികാരങ്ങൾ പങ്കിട്ടു. 

എനിക്കെന്താണ് കടലിനോടിത്ര താല്പര്യം എന്ന ചോദ്യത്തിന് മറുപടിയായ് ഞാൻ പാടിയത്:

ഞാനൊരു കടൽ... 
എന്നുള്ളിലൊരു കടൽ... 
കടലിൽ നിന്നും കടലിലേക്കൊഴുകുന്ന 
കരിനീല, തെളിനീല കടൽ... 

അയാൾക്ക് ഇപ്പൊത്തന്നെ കടലിന്നടിയിൽ പോകണമത്രേ... 
കടലാഴത്തിലെ മണൽമെത്തയിൽ അന്തിമയങ്ങണമത്രേ... 
ഞാനയാളേം കൊണ്ട് 
വാക്കുകൾ മെനഞ്ഞ കടൽലോകത്തേക്ക് പോയി. 

ഞങ്ങളിരുവരും കിളിമീനുകളോട് കിന്നാരം പറഞ്ഞു...
നക്ഷത്രമത്സ്യങ്ങൾകൊണ്ട് നക്ഷത്രമാല തീർത്തു...
കണവകളോട് കൂന്തൽ കടം മേടിച്ച് തോരണങ്ങളൊരുക്കി... 
മത്തികുഞ്ഞുങ്ങളും നത്തോലികളും പതിവായി ഏർപ്പെടാറുള്ള ഒളിച്ചുകളിയിൽ ഞങ്ങളും കൂട്ടുകൂടി... 
കടൽപ്പായലുകൾക്കുള്ളിൽ പതുങ്ങിയിരുന്ന് നീലത്തിമിംഗലത്തിന്റെ ഘനഗർജിതാലാപനത്തിന് കാതുകളേകി...  
കടൽകുതിരകളുടെ മേലിലേറി മത്സ്യകന്യകയെ കാണാൻ പോയി... 
ഉയിരുള്ള കാലം വരെയും കണ്ണഞ്ചിപ്പിക്കുന്ന കടൽക്കാഴ്ച്ചകൾ കപ്പം കൊടുക്കാതെ കാണാനുള്ള വരത്തിനായ് നിവേദനം സമർപ്പിച്ചു...

അപരിചിതരായ കടലിന്റെ രണ്ടു കമിതാക്കൾ ആധുനിക സാങ്കേതിക സമതലഭൂമിയിൽ  സംഗമിച്ചാൽ ചുരുങ്ങിയ സമയംകൊണ്ട് പങ്കിടാൻ പറ്റുന്നതിന്റെ പരമാവധി കടലനുഭവങ്ങൾ അന്യോന്യം കൈമാറി ഞങ്ങൾ. 
ഇടനെഞ്ചിലെവിടെയോ അന്ന് ഞങ്ങൾ 
പൊതുവായി അനുരാഗം പങ്കിട്ട 
കടലിൻ്റെ ഓർമ്മകൾ അയവിറക്കി. 
അയാളുമൊരു കടലാണ്... 
അയാൾക്കുള്ളിലും കടലാണ്... 
അയാളും പതിവായി കടലിൽ നിന്നും 
കടലിലേക്കൊഴുകാറുണ്ട്...

- ഫ്രഡി

കൂട്ടിക്കെട്ടലുകൾ

ബന്ധങ്ങൾ ചിലതു അങ്ങിനെയാണ് .. അറിഞ്ഞുകൊണ്ട് വന്നു ചേർക്കപെടുന്നതും  .. ചിലതു താൻ  പോലുമറിയാതെ തന്നിലേക്ക് വന്നു ലയിച്ചു ചേരുന്നതും .. ഈ കൊച്ചു ജീവിതത്തിലേക്ക് അറിഞ്ഞോ അറിയാതെയോ എത്തി  ചേരുന്ന ജീവനുകൾ ഉണ്ട്‌. ഒരുപാടു മോഹങ്ങളും സ്വപ്നങ്ങളും ഒക്കെയുള്ളവർ.പുതുമണ്ണിന്റെ മണം മായുന്നതിനേക്കാൾ    വേഗത്തിൽ പരസ്പരം തോന്നിയ പ്രണയം കൈമോശം വരുന്നവർ ..

തെറ്റ് പറയുന്നില്ല..പറയാനുമാവില്ല .. രണ്ടു സാഹചര്യങ്ങളിൽ വളർന്ന..വളർത്തപ്പെട്ട,സംസ്‍കാരം കൊണ്ടും സംസാരം കൊണ്ടും വ്യത്യസ്തരായവർ.. 

ഇഷ്ടക്കേടുകൾ പരസ്പരം തുറന്നു പറയാൻ പറ്റാതാവുന്നിടത്തു തകർന്നു തുടങ്ങുന്ന,കണ്ണീരിന്റെയും വാക്പോരിന്റെയും സമ്മർദ്ദം കൊണ്ട് വീർപ്പുമുട്ടുന്ന ജീവച്ഛവങ്ങളായ മനുഷ്യർ.. 

ഇത്രയും കാലം നമ്മൾ കണ്ടത് ഈ സമൂഹം വളർത്തിയ മനുഷ്യരെ ആണ് .നിങ്ങൾ എന്ത് കരുത്തും എന്ന് കരുതി തന്നിലേക്ക്   തന്നെ ഒളിച്ചവർ.. 

ഈ തലമുറയ്ക്ക് മുന്നിലേക്ക് ഞാനും നിങ്ങളും ഉൾപ്പെടുന്ന ഈ സമൂഹം തുറന്നു  വച്ചിരിക്കുന്ന ഒരു വലിയ ലോകമുണ്ട്..ഇഷ്ടങ്ങളെ ഓടിച്ചിട്ട് പിടിക്കാൻ പ്രോത്സാഹിപ്പിക്കുന്ന .. ഇഷ്ടമില്ലായ്മകളെ പച്ചക്കു വിളിച്ചു പറയാൻ ഓർമിപ്പിക്കുന്ന .. നീ സ്വീകാര്യനായിടത്തു പാറിപ്പറന്നു നടക്കാൻ ആശംസിക്കുന്ന സുന്ദരമായ ഒരു ലോകം..

നിന്റെ മുൻപിലേക്ക് ചില options ഞാൻ തരികയാണ്..ഞാനാണ് ഈ ലോകത്തു ജീവിക്കേണ്ടത് എന്ന ബോധ്യം നിനക്കുണ്ടാവണം.. എന്റെ സഹയാത്രികൻ എന്ന്നെ മനസിലാക്കുന്നവരാണ് എന്ന തിരിച്ചറിവും നീ ഉണ്ടാക്കിയെടുക്കണം.നീ സ്വീകരിക്കപ്പെടാത്തിടത്തു നിന്ന് ഹൃദയഭാരമില്ലാതെ മാറി നടക്കാൻ നീ പഠിക്കണം..ഈ ജീവിതം ഒന്നേയുള്ളുവെന്നും വെറുപ്പും നിരാശയും നിന്നെ തളർത്തുമെന്നും  നീ തിരിച്ചറിയുന്നിടത്തുനിന്നു നിനക്ക് ഉയർന്നു പറക്കാൻ പറ്റണം….ഈ ലോകം നിന്റെയാണ്. ആവോളം സ്നേഹിക്കു.. സ്നേഹിക്കപ്പെടു .. ഇഷ്ടങ്ങൾ.. അടക്കിപിടിക്കാതെ അലറിവിളിച്ചു ഈ ലോകത്തോട് പറയു .. കേൾക്കട്ടെ .. എല്ലാവര്ക്കും തിരിച്ചറിവുണ്ടാവട്ടെ

- ബട്ടർഫ്‌ളൈ 

തിരഞ്ഞെടുപ്പ്

തിരഞ്ഞെടുപ്പ് എന്നതൊരു വല്യ കടമ്പ തന്നെയാണ്, അത് വൈവാഹിക ജീവിതത്തെ പറ്റി ആകുമ്പോ പ്രത്യേകിച്ചും. പലരുടെയും കാഴ്ചപ്പാടുകളും സ്വപനങ്ങളും ഒക്കെ വ്യത്യസപെട്ടിരിക്കും. എങ്ങനെ ഒരാളെ തിരഞ്ഞെടുക്കാം .. വലിയ ഒരു സമസ്യ തന്നെ ആണ് …. എപ്പൊഴും നമ്മുടെ തീരുമാനങ്ങൾ നമ്മുടെ ചിന്തകൾ മനസ്സിലാക്കിയത് ഒക്കെ ശരിയാക്കണം  എന്നുമില്ല ....എന്റെ കാഴ്ചപ്പാടിൽ നിങ്ങൾ വ്യത്യസ്തരായതു കൊണ്ട് തന്നെ ഇങ്ങനെ ആകണം തിരഞ്ഞെടുക്കപ്പെടേണ്ട ആൾ എന്ന് പറയാനും എനിക്കു സാധിക്കില്ല .. എന്നാൽ ഒന്ന് മാത്രം പറയാം മറ്റുള്ളവരുടെ നിയന്ത്രണത്തിൽ ആകരുത് നിങ്ങളുടെ തിരഞ്ഞെടുപ്പ് .. ചിലർക്ക്  എങ്കിലും ആരൊക്കെയോ അവരുടെ  ജീവിതത്തിൽ സ്വപ്ങ്ങളെ ഇല്ലാതാക്കാൻ ഉള്ള സമയവും..ഒരു തരത്തിലും പൊരുത്തപ്പെടാത്ത ആളെ പൊരുത്തം നോക്കി തീരുമാനിച്ചു കൊടുക്കുന്ന സമയം കൂടി ആണ് .. ഒരെ ദിശയിലേക്കു നോക്കാൻ കഴിയാത്ത രണ്ടുപേർ ഒരു സ്ഥലത്തു നിന്ന് മുന്നോട്ടു പോകാൻ ശ്രമിക്കുകയാണ് പലപ്പോഴും പലരുടെയും ജീവിതം .... പരസ്പര പൂരകങ്ങൾ അല്ലാത്ത രണ്ടു പേരെ മാടിന്റെ കഴുത്തിൽ കെട്ടിയ കയറുപോലെ കുടംബക്കാരുടെ സമൂഹത്തിനെ എല്ലാം നിയന്ത്രണത്തിൽ.. അവരെ മുന്നോട്ടേക്കു തള്ളി വിടുന്നു അതിനും പേര് കല്യാണം …. ഇതാണ് പലരുടെയും തിരഞ്ഞെടുപ്പ് .. ഓരോ വ്യക്തിയുടെയും മരണം കൊണ്ടുപോലും വേർപിരിക്കാൻ പറ്റാത്ത ബന്ധമായി കുടുങ്ങിയ ചങ്ങലയാണ് ചിലർക്ക് എങ്കിലും  കല്യാണം എന്നത് …. തിരഞ്ഞെടുപ്പ് എന്നത് ഓരോ വ്യക്തിയുടെയും സ്വാതന്ത്യം ആണെന്നും നമ്മുടെ വീട്ടിൽ സമൂഹത്തിൽ നമുക്കൊപ്പം ജീവിക്കുന്ന ഓരോരുത്തരും  ഓരോ വ്യക്തികൾ ആണെന്നുള്ള കാഴ്ചപ്പാട് ഉണ്ടാകേണ്ടത് നമ്മുടെ കുടുംബത്തിൽ തന്നെ ആണ് . അതിനുള്ള അരങ്ങു കൂടി ആയി തീരട്ടെ  ..കൂടുമ്പോ ഇമ്പമുള്ള നമ്മുടെ ഓരോ ഇടങ്ങളും എന്ന് … എന്നു മാത്രം ആഗ്രഹിച്ചുകൊണ്ട്

- നിങ്ങളുടെ സ്വന്തം അശ്വിൻ 

കോഴിക്കോട് മീറ്റപ്പ്

 

ബ്രിട്ടീഷ് സാമ്പാർ

പുതിയ മോഡ്‌സിനു സ്വാഗതം

 - നിങ്ങളുടെ സ്വന്തം അശ്വിൻ 

എൻ്റെ മകന്

ഭ്രാന്തമായ സ്നേഹം മാത്രം ആണ് അവനോടു. ഓരോ നിമിഷവും അവൻ എന്നിൽ നിറക്കുന്ന സന്തോഷം ചെറുപുഞ്ചിരിയിൽ ഒതുക്കുമ്പോഴും മനസ്സിൽ ഒരു കടലോളം സ്നേഹവും സന്തോഷവും… ശ്വാസത്തിനായ് അവന്റെ ആദ്യ കരച്ചിൽ ഇന്നും എൻറെ ചെവിയിൽ മുഴങ്ങുന്നു.. കുസൃതി നിറഞ്ഞ ചിരികൾ നിർബന്ധങ്ങൾ.. ചെറിയ വീഴ്ചകൾ കിണുങ്ങി കരച്ചിലുകൾ അങ്ങനെ ഓരോന്നും.. അവൻ വളരുകയാണ്  എനിക്കു മേലേക്ക്.. ആഘോഷിക്കുകയാണ് അവന്റെ വളർച്ച.... പക്ഷെ എന്റെ പേടി ഓരോ ദിവസവും പുതിയ പുതിയ കൂടുതൽ അറിവ് അവൻ നേടുമ്പോൾ അവന്റെ കൂട്ടുകാരനായി അവന്റെ സ്വപ്നങ്ങളിൽ അവനെ നയിക്കുവാൻ എനിക്ക് കഴിയുമോ? സ്വപനങ്ങളിൽ നിന്ന് സ്വപ്ങ്ങളിലേക്കു  പറക്കുവാൻ അഹ്രഹിക്കുന്ന ആ കുഞ്ഞു മനസ്സിനെ എൻറെ ബലഹീനതയിൽ പിടിച്ചു നിർത്താൻ എനിക്കു കഴിയില്ലല്ലോ. അവൻ വളരട്ടെ ആകാശവും കടലും കണ്ടു.... അതുകണ്ടു അവനു താങ്ങായി ഒന്ന് വീണുപോയാൽ ഞാൻ ഉണ്ട് കൂടെ എന്ന ഒരു വാക്കിൽ നെഞ്ചിൽ അണകെട്ടികിടക്കുന്ന സ്നേഹം അവൻ തിരിച്ചറിയും... ഓരോ നിമിഷവും ഒരായിരം ഓർമ്മകൾ ആണ് അവൻ തരുന്നത്.... എത്ര ഉയത്തിൽ ആയാലും എത്ര ദൂരത്തു ആയാലും ഇപ്പോഴും കുഞ്ഞേ എന്ന് വിളിക്കാൻ എൻറെ മന്സ്സു തുടിച്ചുകൊണ്ടേ ഇരിക്കും...

- നിങ്ങളുടെ സ്വന്തം അശ്വിൻ